فى الخيال

في الخيـال هايم معاها
في الخيال باطلب رضاها
وهي تضحك، وآدي إيدي
أمِدَّها، تلمس شفاها
واحسّ بيهـا، بحُبَّهـا
بنظرة شقية أموت فداها
ضحكة وبريئة بثغرها
وتتملي الدنيا بضياها
والقى نفسي بقيت سحابة
هايمة في روحها وهواها
وافرد جناحي واضمها
وهي تعلى واطير وراها
تاخدني تاني لقلبها
ف رحلة ما اعرف منتهاها
واسمع صوت يغني،
ولحنها، واسمع نداها
واصرخ بنشوة بحِبَّهـا
واحلف ما احب في يوم سواها
وهي تسمعني تقول
"قُلها تاني"، واقول معاها
واسمع "بحِبَّك" منَّهـا
والكون يعيد ويعيد صداها
واصحى من حلمي ألاقي
رعشة إيديّا وألف آهة
ولساني معقود، وحالي
ما ينوصف، أيوه بصراحة
الحلم أحسن م الحقيقة
الحلم راحة،
الحلم راحة.